Baden-Vürtemberq torpağı qədimdən zəhmətkeş və yaradıcı əhalisi ilə seçilib. Bu xüsusiyyət Baden-Vürtemberq torpağının sadəcə kiçik xarakteristikasıdır. Belə ki, regionu əsas fərqləndirən xüsusiyyət – buradakı dinamik və hərtərəfli zəngin həyatdır. Baden-Vürtemberq torpağının paytaxtı – yarım milyonluq əhalisi olan Ştutqartdır. Bu şəhər Almaniyanın Berlin, Münhen, Frankfurt-Mayn kimi mühüm meqapolislərindən biridir. Şəhər bir neçə təpə üzərində Nekkar çayının vadisində mənzərəli şəkildə yerləşmişdir. Buna görə də şəhər küçələri vaxtaşırı burada adlanan “şteffele” əydəmli pilləkənlərə çevrilir. Ştutqart – universitet mərkəzi ( burada iki universitet yerləşir), Almaniyanın avtomobil mərkəzlərindən biri (“Mersedes-Benz” və “Porşe” kompaniyaları) və iri sənaye mərkəzidir. Ştutqartın relyefi və yumşaq vadi iqlimi ərazidə, xüsusilə də ətraf məkanlarda üzüm bağlarının salınmasına zəmin yaratmışdır. Burada nəinki ağ üzüm, həmçinin Almaniya üçün nadir olan qara üzüm də yetişir. Ştutqartın fəxri və Vürtemberqin ən yaxşı qırmızı şərabı “Trollinger”-dir.
Almanlar şəhərin məhz “Ştutqart” kimi adlanmasını asanlıqla açıqlayırlar: tərcümədə, “Ştutqart” madyan bağı deməkdir. Əslində isə bura at zavodunun ərazisi olub: təxminən 950-ci ildə müasir Ştutqart ərazisində hersoq Almaniyalı Lütolf at zavodunun əsasını qoymuşdur. Şəhərin adı simvolik olaraq şəhər gerbinin üzərində təsvir olunub: sarı fonda qara at.
Zamanla şəhər Vürtemberq krallığının paytaxtına çevrilir və XIX əsrin ortasına kimi bu statusu qoruyub saxlayır. Ştutqart əhalisi – şvablar indiyədək digər federal torpaqlarla müqayisədə özlərini çox müstəqil aparırlar. Belə ki, əhali Baden-Vürtemberqin müstəqilliyini unuda bilmir.
Ştutqart özünün iki əsas stadionu və bir çox idman kompleksləri ilə dəfələrlə beynəlxalq yarışmalarına ev sahibliyi etmişdir. Burada 1989-cu ildə qadın voleybolu üzrə Avropa çempionatı, 1993-cü ildə yüngül atletika üzrə dünya çempionatı, 2000-ci ildə federal əhəmiyyətli velosiped yarışları keçirilmişdir. Bu kimi tədbirlər şəhəri Almaniyanın idman mərkəzlərindən biri kimi tanıtmışdır.
